2017年5月19日 星期五

說說輝山

輝山乳業停牌差不多2個月, 從各新聞報導睇來, 復牌機會微乎其微。
今次出事, 據知有好多銀行同證券行都瀨左野, 輸幾千萬到過億比比皆是。當中聽講平安銀行借左超過20億俾輝山, 而抵押既股票聽聞係由興證代托管既。

從港交所中央結算系統持股中可見, 興證揸左輝山發行量46.24%股票:














有新聞話平安收左輝山34億股做抵押 (link), 而興證托管住62億股, 佢地自己有無借呢? 第時睇下佢地財報可能會略知一二。

其實係混水出沽空報告前, 業內做融資既都知道輝山四處問金融機構借錢, 2016年年中左右, 佢地想抵押股票借2-3億美元, 不過可能無乜人肯借咁大條數俾佢地。因為到左2017年初, 佢地更獅子開大口, 想押貨借40億港紙, 希望有行家可以組成銀團借錢俾佢地。果時已經知道混水出左沽空報告啦, 如果仲夠膽借, 間公司班友應該係傻仔! XD 

但係, 接到呢D借錢查詢既sales, 永遠都覺得: "哇~大生意呀, 做啦!"  而最終做唔做, 就睇間金融機構既風險管理文化同水平喇!

係佢地問人借錢無幾耐, 輝山就出事了。

其實從以上case, 我想帶出:
1) 行內借錢俾客主要有2種方法, i) 孖長, ii) 股權抵押
2) 我觀察所得既業內風氣(中資)
3) 大股東抵押借錢既情況同潛在影響

遲D有時間續樣講, 不過我文筆同思維都低水平, 未必會寫得好好。

2017年5月17日 星期三

關於那50隻不宜持有的股票

David Webb係前兩日(5月15日)出左篇文, 指出50隻股票係唔適宜持有既。因為有部份股票明顯係有泡沫情況, 有D股票又俾SFC出過通告指股東集中度過高, 即是股價客易被舞高弄低!


從webb-site提供既關聯圖睇到, 呢D上市公司會同時持有其他上市公司股票, Webb認為呢D司, 好多持股比例低於要披露既5%, 但當某上市公司有需要通過某些事項時, 佢地就可能合埋有明顯既投票權。而另一方面, 張圖右下角指出左幾隻明顯係有泡沫既股票。

前兩日當我見到呢個List時, 第一眼就係熟口熟面, 係過去一年幾入面, 相信唔少行家已經招呼過佢地唔少次, 以我所知, 有好多證券行都有借孖展俾呢D股票。

點玩呢? 是咁的...
據知(帶頭盔先, 我無話我有接觸呀下, 唔關我事), 市場上有好多班大陸仔, 周圍搵證券行開孖展戶口, 話存入3000~5000萬貨值股票, 希望得到1:1孖展; 即係存入5000萬股票入來, 間鋪再借5000萬俾佢地買貨。班友呢, 來自深圳又有, 華中華北又有, 唔理邊Q度來, 都係開口講一樣既要求條件。最搞笑係, 佢地都會話自己係有獨立團隊選股, 經過分析先買架; 佢地又會自動俾個shortlist行家睇, 話主要買邊隻股票, 一般有30-60隻股票既, 同Webb指出既股票, 撞左無9成都有8成。有D醒D既, 會係個shortlist度滲入D大型股票, 但聽講佢地開戶後係絕對唔會買既 XD。

而不約而同, 佢地都會話自己背後總資金有20億。如果呢班友講真的話, 一團人5000萬, 就有40團, 可以搵好多間大小證券行借錢, 倍大左有40億, 咁你話Webb list出來果D股仔會點呢? 無事無幹, 可能有D股會被造高, 如果有事時, 幾十間行一齊斬倉, 咁半日跌70%~90%就係等閒事啦。

我都唔記得幾多年無玩股仔, 由其係覺得股仔根本係好多老千股、莊家股, 唔好彩一兩日就玩完, 都時喊都無謂!


2017年5月16日 星期二

第一篇網誌, 作為記錄。

在證券呢行做左超過十年野, 作為工資奴隸, 往往係人浮於事, 邊度有機會、邊度睇落好D, 就去邊度做啦。

而近年既Trend, 都係中資玩晒, 所以過去換左幾間行, 都係中資。但近年感覺係越來越唔對路, 做野方式越來越騎呢, 有時好痴線, 間唔中會有俾班大陸所謂領導激Q死既感覺。

正因為咁, 想借呢個blog來記低一D事, 第時睇返笑下都好。

*有D內容, 因為某D原因, 可能會以故事形式寫出來, 當故仔睇下算囉~